【採訪手記】 🇪🇬 埃及住家菜「酸汁」平民盛宴 ｜導演主持試食後感
即看 《英倫住家菜》 港式混醬腸粉遇上埃及國菜 Koshari！🇪🇬
🔴 導演有感
喺英國其實唔難遇到埃及人，但好多時大家對佢哋嘅飲食文化都唔係好了解，我自己以前都係咁。以前講起埃及，除咗知道佢係四大古文明之一，其實都冇乜認識。
今次參與節目製作，由資料搜集到拍攝，真係令我大開眼界，仲認識到埃及嘅國民料理 Koshari。第一次見到佢嘅材料配搭，其實已經覺得好得意：有飯、有意粉、扁豆、鷹嘴豆，再加埋番茄醬同香脆洋蔥，真係令人忍唔住好奇，咁樣夾埋會係咩味呢？
同時，呢次經驗都打破咗我唔少原本嘅諗法。尤其係同 Maria 合作嘅時候，發現原來埃及人都幾風趣幽默。
我哋成日都話要跳出自己嘅 comfort zone，而飲食其實就係一個好好嘅開始。對唔少香港人嚟講，嚟到英國之後，熟悉嘅味道會帶嚟一種安全感。但其實世界上有好多唔同嘅味道，而每一種味道背後，都有佢自己嘅文化同故事。
就好似今集介紹嘅埃及菜，睇落好簡單，但其實可以煮出好有層次嘅味道，亦都係好多埃及人日常會食嘅住家菜。
如果大家都想試下呢個埃及國民料理 Koshari，其實喺英國都搵到唔錯嘅選擇，例如：
📍 Koshari Street
不妨試下呢碗埃及住家菜，當係試下跳出你嘅味覺 comfort zone。
大家又想我們下次介紹哪一個國家的住家菜？或者有沒有一直想試、但未試過的料理？歡迎留言分享 👀
🔵 主持後記
埃及係四大文明古國 ，我對佢嘅食物係0認識，不過越唔識，就越要試！
平時喺英國超市見到好多香料同醬汁，但自己煮餸好少會用到，總覺得有啲沮喪。今次整Koshari先發現，小扁豆、鷹嘴豆、孜然粉、蒜粉、醋...可以咁樣用！
呢個埃及國菜，有米飯，通粉，又有豆，但食落一啲都唔寡。最Surprise 當然係個埃及蒜醋啦，超級惹味！
不過味道係其次，陪伴誠可貴。無論屋企人、朋友鄰舍、或者新認識嘅異鄉人都好。今次嘅嘉賓Maria 係棟篤笑藝人，幽默感十足，同佢一齊食嘢傾計，真係充滿情緒的價值。
留言講下，你哋下一次想我哋整咩菜？
*****************
❗ 資訊有價 🌱
月訂、年訂、單次 支持 《綠豆》 營運
******************