【港督原來喺左近】 創作團隊的話：原來呢個係 「不成功」 嘅旅遊節目！🎬 

先來個賣花讚花香：《港督原來喺左近》 由構思、搵資料、拍攝、考證、到後製，足足用左一年半時間，由決定研究哪位港督，到配對合適嘅移英港人，都費盡心思，力求以最有趣嘅方法，同大家講呢段好重要嘅歷史。等我 Green Bean Buddy 講個秘密俾大家知，呢輯 「山寨級史詩式」 歷史紀錄片，原來係一個 「唔成功」 嘅旅遊節目！

當初構思節目時，團隊幻想可以跟着港督們在英足跡，周圍吃喝玩樂，喺偏遠（退休勝地）嘅隱世美景打卡，點知越鑽研越發不可收拾，遊山玩水變成喺 National Archive 啃文件。再次印證：認真就會輸！咁當然，當中有另一番趣味啦！雖然最後景點唔多，但團隊都大大話話去左七個大城小鎮，遍及英格蘭嘅東西南面架！以 《綠豆》 嘅山寨規模，真係極限啦～

唔少港督畢生都喺外地工作，發掘佢地喺英國嘅足跡難度甚高，不過最艱難嘅，都係要搵到合適嘅移英港人擔任主角。最後能夠搵到四位朋友落水參與拍攝，實在係非常萬分超級感謝佢地嘅信任，佢地都為節目落左唔少苦功，喺繁忙嘅日程中睇參考資料 （有時睇得比導演仲要熟），在此向佢地、以及所有喺資料搜集過程中幫忙過嘅香港人致謝！

另一位需要大大力感謝嘅人，就是義務聲音導航薯伯伯。佢首次做 「旁白君」，實在潛力無限，而且對任務非常認真，對於片中眾多英文人名、地名，佢逐字查字典，仲早一晚喺稿上註好拼音，今時今日，竟然仲有人識得睇 Phonics，真係好厲害。薯伯伯見識廣博，對香港歷史都好熟悉，佢多次發現旁白寫法語意不清，或引起歧義，都主動同導演商榷，令整個製作又精進一點！

由於資源緊絀，為了壓縮拍攝時間，我們實在苦了攝影師，例如拍攝葛量洪一集時，在倫敦一日去左五個拍攝場地！喺一日只做一件事嘅英國，呢件事諗番都覺得不可思議。（感謝 underground 運作暢順) 

回想年半前，跟 Green Bean Big Boss 討論節目構思，「在英國尋找港督」 呢個念頭其實係來自一個疑問：點解其他被殖民嘅地方，對殖民統治如此批判；但偏偏有唔少香港人對宗主國印象唔錯？係我哋失憶，抑或大家經歷截然不同？Overground 有條路線叫 Windrush，大家有無留意名字跟其他殖民地有何淵源？（提示喺葛量洪個集）其他前殖民地嘅離散社群，同我哋有無連繫交流嘅地方？期待首映當日見到你，睇完一齊傾計交流！

*****************

🎬 🎟 《港督原來喺左近》 16/11/2025 倫敦首映 活動詳情 / 立即購票

https://bit.ly/GBMLondonPremiere（座位有限，賣完即止）

*****************