【綠豆｜採訪手記】 挑戰製作死線 ⚡金睛火眼尋真相｜讓港、英兩地故事被看見 🇭🇰🇬🇧

「綠豆仔」 今個星期，除咗再次挑戰製作死線之外，仲考眼力，尋真相。喺短短三日內，將被警察箍頸、死於非法被殺嘅陳輝旺家屬 4,000 多字來信變成影片！又喺英國國會辯論 BNO 5+1 嘅畫面入面，搵到大家都關注嘅 Reform UK 國會議員身影！

▌打燈要用水樽和拆蓋風扇？💡

陳輝旺嘅死有好多荒謬同不公義嘅事，山寨如 《綠豆》 收到家屬來信都不敢怠慢。成日聽到「綠豆仔」講山寨製作，究竟係點？睇下呢張相就知。

帶出影片嘅係封信。以前有資源，呢啲拍攝工作，當然入studio，打哂燈咁拍；而家山寨嘅做法，係喺屋企鋪張黑色布，然後自己打燈。細心嘅觀眾會留意到，兩棧燈前，分別放左一個水樽，同一把拆左蓋嘅風扇，點解要咁做呢？

原來水樽係用來做一個簡單嘅柔光器（行內叫：diffuser），事關 LED 燈直射落去文件會反光，同埋啲光會好硬，用左個水樽，就可以柔和啲，仲有折射效果。同樣道理，個風扇拆左個蓋，Roll機時開著風扇，將啲光折射到文件上，咁映出來，畫面質感就好唔同。

無錢無資源，但又要做到專業級數，唯有用啲山寨式嘅方法去做！

▌五湖四海拆件式製作 🌏

今次呢條片：寫稿、剪片、拍片，仲要畫插畫，做 animation，連真人聲演都做埋。行內人會知道，呢啲正常要幾個星期先搞得掂。我地喺三日內完成，全靠一班五湖四海嘅 「綠豆仔」。

當然，「綠豆仔」 都係想再做多啲。上星期，英國國會辯論 BN(O) 簽證 5+1 嘅新聞出街後，好多移英港人都關注邊個 MP 有發言，自己嗰區嘅 MP 有冇份，同埋問：民意領先嘅 Reform UK 去咗邊。

▌睇片尋人考眼力👀

上星期睇新聞嘅觀眾都知道，喺辯論發言名單上 Reform UK 影都冇。但，移民議題係佢哋最關注嘅，連影都冇實在太唔合理。

尋根究底嘅 「綠豆仔」 決定要翻睇當日國會辯論嘅影片！放大啲…… 咁朦嘅 ……呢個！呢個！「綠豆仔」 金晴火眼，喺鏡頭冇對焦嘅人頭入面， 搵到 Reform UK 其中一名 MP 就坐喺西敏廳入面！有出席，冇發言，齋坐，仲未完，唔再聽嘞，起身，bye bye。議事廳入面，呢個都係一個重要嘅政治姿態。想知道嗰位議員何方神聖，大家 click返條片入去睇啦。👉  https://youtu.be/AFbyks-fLXQ

今個星期，仲有 「綠豆仔」 去採訪倫敦舉行嘅首屆香港人運動會，老中青香港人再踏足運動場，又係乜景像呢？ 當然，《兩邊走走》、《英國這邊事》 同 《國際多Bean事》 一樣咁精彩！

▌課金支持我們做更多💚

「綠豆仔」 呢兩個星期請大家以實際行動支持，我哋嘅 Patreon 多咗人訂閱，YouTube亦多咗人打賞。但影片製作嘅資源，真係⋯⋯ 仲未付費訂閱的，記得馬上課金支持！非常需要大家長期同穩定嘅灌溉啊！多謝多謝！

P.S. 上星期有留言提醒 「綠豆仔」 做新聞可以用 AI 認人，多謝觀眾意見 🙏。其實我哋都有嘗試，但現實效果並非如我哋所願。似乎暫時都係：AI 可以輔助，但不能盡信，始終都要人肉核實。好似有位國會議員（唔開名嘞），選舉時有濃密秀髮，上任短短一年，影片入面嘅佢變咗地中海嘅？！

*****************

收看 「死於非法被殺」 的士司機家屬來信聲音演繹

👉 https://youtu.be/rZ_7oE8mThc

收看BN(O) 簽證辯論：Reform UK 議員去咗邊？

👉  https://youtu.be/AFbyks-fLXQ

*****************

🌱 支持《綠豆》營運，記錄當下，繼續發聲 💬

https://bit.ly/SupportGBM

其他已登陸平台 Patreon | Facebook | Instagram | Apple Podcast | Spotify Podcast

*****************